Evo van i ovu šetemonu jedna ricieta koja se vrimenon puno izminila i judi je tumačidu kako ko hočie, a to je “buzara” (ime je talijanizam).

A za našiega barba Matu Bočinetota ovo bi moglo bit taman jerbo se kuho somo petnaiest minuti, doboto ko i teleći šnicel na pasuru sa dvo joja!

E sad ovako:

Očistimo luk i petrusimul i izrižemo hi na sitno po parčomo ono ča smo mislili bocit na buzaru, a to von mogu bit:

škampi, kozice, pedoči, čuke ili bilo koje drugie škojke ili raci, a posebna je i nojboja od parst…h.

U teču ulijemo malo proviega maslinovega uja i kad se stepli hitimo luk i petrusimul po čin malo samre butomo škuojke ili rake.  Malo hi žutimo i dobro mišomo da pustidu šug iz sebie, a onda ulijemo provega bilega vina pa malo papra, pokrijemo pokrivon i pustimo da malo kuho, otkrijemo teču, pustimo da vino još malo izvitri, a ako nan je šug puno ridak dodomo malo priezlie i to je to!!

Tribo spomienut tri stvori, a to je da u buzaru ne giriedu pomidori ili konšierva i drugo da bi sve škuojke vajalo stavit u slatku vodu da se otvoridu i onda hi stavit kuhot jer ako hi stavite olma iz muora moglo bi von bit puno slono, a u buzaru od parst…h ne grie nego pinku vina jer je nojboje kal oni somi pustidu šug!

Fola barba Mati če me je spomienu u tastamientu i gledot ču noč onu ricetu juhie od morskih stinjo jerbo se spominjen da mi je pokojno mama nidir notala u libar od riceti!

Uslast!

* Stavovi izneseni u kolumnama, vašim vijestima i komentarima osobni su stavovi autora i ne izražavaju nužno stav redakcije portala BOLinfo.hr