Između 1988. – 1990. godine, dakle prije 30-tak godina, napisao sada pokojni Nikola Cvitanić pok. Jakova, oli ti ga naš mudri Boljanin Mikica Borovina.
ZLOTNI ROT
SVUKUD JE LIPO,
SVUKUD SE UŽIVO,
MA ĆA JE NA “ZLOTNI ROT”,
TEGA NIKUD NIMO.
ŽOLO SITNO, OKRUGLO I FINO
PO NJEMU ŠIJETAT PROPJA JE DIVNO.
MUORE ČISTO KO BISER PROVI
NI MU POTRIBA DA GA IKUOR FOLI.
S JEDNU STRONU FURTUNA KO BARDO,
A SA DRUGIJE STRONIJE UOPĆE NE MARDO.
KUO NI VIDI VIROVOT NE MOŽE
DA I LOKVU NA PUNTU UČINIT MOŽE.
Izrecitiro mi je ovu Pismu koju son zapisala i reko :
Molo moja, a sada me DOBRO slušoj ča ću ti reč!
Buog i priroda su Bolu i Boljanima sve doli, somo neka nin Buog do pamijeti. Čuvojte Rot za vike vikuova, jer von je to kruh budućnosti i živjenja u Bolu.
Fola Von barba Mikica.
Fanika Klisović
* Stavovi izneseni u kolumnama, vašim vijestima i komentarima osobni su stavovi autora i ne izražavaju nužno stav redakcije portala BOLinfo.hr
Droga Fanika,
hvola ti na ovemu svidočanstvu i ča si ove lipe misli i riči našega pok. barba Mikicje podilila sa nami.
Nažalost, mislin da hi malo kuo razumi. Postali smo svi pametni i pripamjetni, bahati i pripotjenti. Mislimo da non ono ča imomo i sa čin nos je Buog (iz nikih ipak nepoznatih razloga) nagrodi nikuor ne može uzijest, ili uništit.
I da je to za vike vikova.
Ali, nikako mi se pari da oni koji su tukali da slušodu nisu slušoli i nisu ništa naučili od judi koji su imali i znanje i jubov i osječaj za svoje misto.
Duošle su druge ideje, drugi je nočin života i duošli su nike druge puno “naprednije fantazije”. Sada nikuor ne može znat kako će se ovo sve zavaršit. Zaigrali smo jedon rulet a zno se da u ruletu malo kuo dobije. Uglavnom se gubi. I zno se puno izgubit, a nikuor izgubi i sve ča imo.
Nami sada ostaje somo da se sa radošču u duši i sa ponoson u sarcu spominjemo judi kakvi su bili pok. barba Mikica i njemu slični. I da budemo sritni ča smo hi imali uzose.
Hvola in na svemu.