Komentar na karnevalodu

Dakle, imomo karnavalodu ovu sada i onu koja je bila pri, u Pukota vrime.
Koja je bojo?

Nojpri, vajo znat da se Puko nikad ni puno mišo u organizaciju povorke kroz misto. To je bilo pripuščeno drugima: Lovrotu, Brankotu, pok. Gemotu i drugima. Pukota je bi tastamenat.
A tastamenat je zno bit interesantan, ali uvik je bi na isti kalup i, iz godinje u godinu sve stereotipniji.
Nazojnu, zojnih godišć – več ni vridi ništa.

Ono o čemu govori gospodin Radović je nojvjerojatnije ono ča je bilo vjezono za Pukota performanse u Elafuzu, koje sa izvornon karnavaloduon nimodu blage veze. Ono je isto bilo interesantno i zabavno, daleko od tega da ni, ali su to bile predstave, igrokazi, kazalište… Ono je bi „one man show“ u kojima je Puko iskazivo svuoj neosporni talenat. Danas to isto uspješno čini, ali na drugi nočin, liti, isprid Marinera, u nika mista po Broču itd.

Za reč pravo, kada je vuon ostavi i kada se udalji od bolskega Karnavola, bilo je malo grubo i tribalo je par godin da se stvori vrotidu u niku normalnu kolotečinu.
Posli onega „one man show“ ni bilo jednostavno počjet lavurat timski i sve ispočjetka.
Ovo kako je sada, je baž onako kako vada da bude.
Karnavaloda imo svuoj rijed, svuoj smisao, vrime i nočin na koji se to sve skupa odigrava. Karnavaloda je doživljaj zajedničke zajebancije i izrugivonja svih sa svima. Ali, zajebancija i izrugivonje je jedno, a vriđonje je drugo. U tastamjenima nesmi bit vriđonja, ali ovega drugega – ča večje to boje.
A sve skupa tek dobije puni smisao kada se smijemo, ne drugima, nego somi sebi. To je onda ona provo, mogli bismo reč – „karnavolska nirvana“.
Izglijedo, da se pomalo vračomo na te store staze sa kojih smo se bili udaljili, jer je (u Pukota vrime) jedino bilo važno ono ča če vuon učinit uvečer u Elafuzu.
Hodili smo u Elafuzu da bi se smijali.

Danas je mnogima žol ča ni onako kako je bilo, ali siguran son da to ne govoridu oni koji grijedu u maškare i koji sudjeluju u ovima pokladnima običajima.
Za tima pasonima vrimenima žalidu oni koji su dohodili gledot nos koji smo se maškarovali i koji su dohodili gledot i slušot ča če to Puko uvečer izvest u svuojima performansima.
Na kraju krajeva, karnavalode nisu takmičenja između mist di čedu bit boje, koje čedu bit boje. Karnavalode i tastamjenti su lokalnega karaktera i vada da „obrađiju“ domače događaje i domače jude.
Kada se uđe u „shemu“ da gledomo kako če se to sve dopast drugima, onda je sve skupa izgubilo smisao i to ni to.

Informacije koje stižu do mene ovamo govoridu da je karnavaloda bila dobra, da je bilo puno maškarih, da je bilo lipo, sadržajno i puno maškarih u kojima su mnogi iskozali veliki trud, lipe ideje i kreativnost.
I da ni bilo „kupuovnih“ maski ča je jako dobar znak.

Čestiton svima koji su sudjelovali. Žol mi je da nison bi doma. Baž če dogodišča bit večje sričje.